МТМ НЕТ

На Економскиот факултет во Прилеп денеска свечено беа презентирани резултатите од проектот „Еко-иновациски хаб“, настан на кој присуствуваше заменик-министерката за животна средина и просторно планирање, Ане Лашкоска. Овој проект, поддржан од ресорното министерство, овозможи формирање на современа лабораторија каде студентите и наставниот кадар веќе работат на практична примена на циркуларната економија. Преку иновативниот процес на селекција и рециклирање на пластика, нејзино претворање во филамент и конечно 3D печатење, хабот создава конкретни еко-производи и решенија.

Заменик-министерката Лашкоска истакна дека ваквите иницијативи се клучни за зелената транзиција, бидејќи го поврзуваат теоретското знаење со реални вештини кои се бараат на современиот пазар на труд. Таа нагласи дека овие хабови ги трансформираат младите во активни носители на одржливи промени, во согласност со Европскиот зелен договор. Деканката на факултетот, проф. д-р Татјана Спасеска, и проф. д-р Моника Ангелоска-Дичовска ја потенцираа важноста на овој академски простор за развој на нови циркуларни бизнис модели. Настанот заврши со практична демонстрација на процесите на рециклирање и печатење, потврдувајќи ја подготвеноста на факултетот да биде предводник во еколошките иновации.