МТМ НЕТ

Мисијата на ОБСЕ во Скопје денеска ги презентираше резултатите од најновото истражување посветено на онлајн и офлајн-насилството врз младите жени и девојки во јавниот живот. Податоците откриваат загрижувачки тренд – голем дел од младите жени се чувствуваат небезбедно на јавни места поради нивниот род, додека стапката на пријавување на ваквите случаи останува критично ниска.

Амбасадорот Килиан Вал, шеф на Мисијата на ОБСЕ во Скопје, порача дека молчењето пред насилството не смее да биде опција. „Сите имаме одговорност да реагираме и пријавиме. Пријавите за насилство мора да бидат приоритет, а институциите се обврзани да делуваат со должно внимание“, нагласи Вал, повикувајќи на конкретни и долготрајни промени во системот.

Министерот за социјална политика, демографија и млади најави дека државата веќе работи на системски одговор преку новата Стратегија за превенција и заштита од насилство врз жените за периодот 2026–2033 година. Целта е да се изгради механизам за рана реакција кој ќе понуди хумана и координирана поддршка, осигурувајќи дека ниту една жртва нема да биде оставена сама на себе.

Истражувањето, кое го спроведе агенцијата „Индаго“ на репрезентативен примерок од 600 испитанички на возраст од 18 до 29 години, нуди длабински увид во новите форми на закани, со посебен акцент на дигиталното насилство. Резултатите укажуваат дека ранливоста е дополнително обликувана од местото на живеење и образованието, што бара специфичен пристап во креирањето на политиките.

Мисијата на ОБСЕ во Скопје, преку Националната работна група за превенција на насилство, ќе продолжи тесно да соработува со домашните институции за да се обезбеди препораките од ова истражување да станат дел од практични мерки со мерливи резултати за поголема безбедност на жените во државата.