МТМ НЕТ

Програмата „ЕУ за Економски Раст“ (EU4EG), финансирана од Европската Унија, вчера го одбележа своето официјално завршување со голем саем на претпријатија во кој учествуваа над педесет микро, мали и средни претпријатија, стартапи, акцелератори и креатори на политики. Проектот зад себе остава значителни резултати, поддржувајќи над сто компании од Полошкиот, Североисточниот, Југозападниот регион и Ресен да ги дигитализираат и озеленат своите практики и да освојат нови пазари.

Во текот на своето траење, EU4EG додели грантови во висина од над 5,5 милиони евра на МСП и стартапи, што резултираше со формирање на 37 нови компании и отворање на 265 нови работни места, од кои голем дел во економски ранливи региони. Посебно се истакнува просечното зголемување на перформансите кај поддржаните компании од 30%, што е значително повеќе од првичната цел од 10%. Дополнително, на пазарот се појавија 129 нови производи и услуги, доказ за силната иновативна енергија на домашниот приватен сектор.

Амбасадорот на ЕУ, Михаелис Рокас, истакна дека резултатите ја потврдуваат посветеноста на ЕУ кон градење модерна, конкурентна и зелена економија во Северна Македонија. „Веруваме во потенцијалот на Северна Македонија. Европската унија останува сигурен партнер и ќе продолжиме да инвестираме во луѓето, во идеите и во регионите што го движат овој напредок“, изјави амбасадорот Рокас.

Проектот, кој беше имплементиран од Германското друштво за меѓународна соработка (GIZ) и АРЕА научниот парк од Трст, Италија, поддржа компании во различни сектори – од производство и земјоделство, до рециклирање, ИКТ и циркуларна економија.

Министерот за економија и труд, Бесар Дурмиши, изјави дека Министерството ќе обезбеди институционален континуитет за да може создадената инфраструктура да живее и по завршувањето на проектот. „Наша задача е да обезбедиме континуитет за оваа инфраструктура да продолжи да живее и по завршувањето на проектот. И во иднина, продолжуваме со поддршката за развој на акцелератори, поддршката за младите иноватори и создавање економски силни региони“, рече министерот Дурмиши.

Заменик амбасадорот на Германија, Јан-Аксел Вос, потврди дека германската поддршка продолжува, нагласувајќи го мандатот за изработка на студија за макроекономската состојба и препораки за подобрување на климата за странски инвестиции. Програмскиот координатор на GIZ, Марк Барет, изрази гордост за МСП и стартапите кои успеале да иновираат, инвестираат и растат преку техничка и финансиска поддршка од проектот.

EU4EG зад себе остава зајакнати институции, поагилен претприемачки екосистем и мрежа на акцелератори и поддржувачки организации кои веќе обезбедуваат одржливи услуги.