МТМ НЕТ

Општина Центар беше домаќин на серија едукативни посети за ученици од основните училишта, реализирани во склоп на наставната програма за локална самоуправа. Градоначалникот Горан Герасимовски лично ги пречека четвртоодделенците, со цел да им ја објасни работата и функционирањето на општината.

Герасимовски им презентираше на децата како локалната самоуправа донесува и спроведува одлуки кои директно влијаат на подобрување на квалитетот на животот на жителите. Учениците активно учествуваа, поставувајќи прашања за надлежностите на општината, покажувајќи голем интерес и свесност за тоа како се води нивната заедница.

„Ми беше чест да им ја доближам работата на Општина Центар на најмладите. Овие средби се од суштинско значење за да се поттикне нивниот интерес и свесност за функционирањето на заедницата, со што градиме одговорни граѓани за иднината“, изјави градоначалникот Герасимовски.

Покрај запознавањето со општинската администрација, во рамките на посетата се одржа и едукативната работилница „Нацртај го своето стебло“. Работилницата беше организирана во соработка со Сојузот на извидници, како дел од проектот „Боренка“, со фокус на подигнување на еколошката свест за значењето на зачувувањето на животната средина и обновата на опожарени подрачја.