МТМ НЕТ

Градот Битола на 6 декември ќе биде домаќин на првиот „Candlelight“ концерт, кој ветува исклучително музичко и визуелно доживување во Центарот за култура. Илјадници свеќи ќе ја осветлат сцената, трансформирајќи ја традиционалната концертна атмосфера во интимно и емотивно доживување.

На ова специјално издание ќе настапи камерниот оркестар „Профундис“, под диригентската палка на маестра Ѓурѓица Дашиќ. Како солист ќе се претстави Владимир Костов, концерт-мајстор на Македонската филхармонија и еден од најценетите македонски виолинисти.

Костов, кој е роден во Битола, има блескава светска кариера со настапи на реномирани сцени како Берлинската филхармонија и Линколн центар во Њујорк. Со својата префинета техника и сценска харизма, тој претставува симбол на современата македонска виолинска школа.

На програмата е ексклузивен избор од ремек-дела на светската и домашната музичка литература, вклучувајќи ги „St. Paul Suite“ од Густав Холст, прочуените „Четири годишни времиња“ од Антонио Вивалди и „Македонско капричо бр. 1“ од Драган Шуплевски.

Маестра Ѓурѓица Дашиќ ја нагласи важноста на овој настан: „Овој концерт е особено значаен затоа што за првпат ја носиме уникатната атмосфера на Candlelight концертите во Битола. Под светлината на свеќите, музиката добива нова димензија – интимна, топла и полна со емоции. Програмата е внимателно одбрана за да ја долови магијата на класичната музика во едно сосема поинакво светло.“

Концептот „Candlelight“ е светски признат тренд каде симбиозата меѓу звукот и топлата светлина на свеќите ја приближува публиката до суштината на музиката. Влезниците за ова премиерно концертно доживување се достапни преку продажната мрежа на МК Тикетс.