МТМ НЕТ

Националниот ансамбл за народни игри и песни на Македонија „Танец“ со длабока тага ја извести јавноста дека годишниот концерт, претходно најавен за 20 декември 2025 година, нема да се одржи. Одлуката за откажување на настанот доаѓа по веста за ненадејната смрт на долгогодишниот член на ансамблот, истакнатиот играорец, солист и кореограф, Симеон Чулев.

Од „Танец“ нагласуваат дека загубата на Чулев е огромна и ненадоместлива за целата македонска културна сцена. Како врвен уметник и нераскинлив дел од играорниот кор, тој со својата енергија и посветеност остави траен печат во негувањето и промоцијата на македонскиот фолклор. Членовите на ансамблот сметаат дека во овие моменти на искрена жалост, невозможно е да се излезе на сцената и да се слави традицијата кога колективот изгуби една од своите најсветли фигури.

Во однос на купените влезници, од ансамблот информираат дека граѓаните ќе можат да ги рефундираат своите средства преку продажната мрежа од каде што биле набавени билетите. Сите дополнителни информации околу евентуални нови термини или идни настани на институцијата ќе бидат соопштени дополнително.

Целиот колектив на НУ „Танец“ изразува сочувство до семејството и пријателите на Симеон Чулев, чиј придонес засекогаш ќе остане врежан во историјата на ансамблот.