МТМ НЕТ

Во седиштето на Европската комисија во Брисел, во присуство на еврокомесарот за проширување Марта Кос, директорот на македонската Царинска управа Бобан Николовски и директорот на бугарската Национална царинска агенција Георги Димов потпишаа Меморандум за електронска размена на податоци. Овој документ е од клучно значење за забрзување на легалната трговија меѓу двете земји и поефикасно спречување на царинските измами, со што директно се зајакнува позицијата на македонската економија на европскиот пазар.

Директорот Николовски истакна дека овој чекор е потврда за силните заложби за забрзана интеграција на државата во Европската Унија и нејзиниот единствен пазар. Тој нагласи дека поддршката од ЕУ е клучна во овој процес, а потпишувањето на меморандумот во Брисел е јасен доказ за тоа. На настанот присуствуваа и челниците на царинските служби од Западен Балкан и ЕУ, како и претставници на ЦЕФТА и Транспортната заедница, што дополнително ја нагласува регионалната важност на оваа соработка.

Со воспоставувањето на електронската размена на податоци, македонската Царина го трасира патот кон поконкурентна економија и поефикасни гранични контроли, придонесувајќи за побрз проток на стоки кон земјите членки на Унијата.