МТМ НЕТ

Претседателката на државата, Гордана Сиљановска Давкова, и претседателот на Сојузот на стопански комори, Горан Ѓорѓиевски, денеска ги врачија престижните признанија „Македонски квалитет“ за 2025 година. Оваа награда се доделува на единаесет компании кои преку своето работење демонстрираат врвни стандарди, стабилен раст и значаен придонес во националната економија и нејзината меѓународна промоција.

Годинава, со ова значајно признание се закитија компаниите: Комерцијална банка АД, Малиќи Груп, Голден Арт, ЛТХ Леарница ДООЕЛ Охрид, Пекабеско АД, Боми 10 Логистик, Нетам ДОО, Еко Логистик Сервис, Кабтел ДООЕЛ, Велидент Трејд и Дамипак ДООЕЛ. Процесот на селекција беше заснован на строги критериуми, вклучувајќи ја финансиската стабилност, деловната етика, вложувањето во човечки капитал и придонесот кон локалната заедница и одржливиот развој.

Претседателката Сиљановска Давкова истакна дека овие награди не се случаен подарок, туку логична последица на стратешко размислување и системско вложување во технологија и луѓе. Таа нагласи дека наградените компании ја персонифицираат зрелоста на македонското стопанство за креирање одржливи модели на раст. Претседателот Горан Ѓорѓиевски додаде дека во време на силна глобална конкуренција, квалитетот веќе не е избор, туку суштинска неопходност која ја гради довербата кај потрошувачите и ја зајакнува националната економија.

Овие компании се вистински амбасадори на домашниот квалитет и клучни двигатели на економскиот развој на Македонија. Нивниот успех служи како инспирација за целото стопанство, покажувајќи дека со јасна визија и истрајност може да се постигнат високи резултати. Сојузот на стопански комори најави дека и во иднина ќе продолжи да создава услови за зголемена конкурентност и поддршка на извозно ориентираните компании.