МТМ НЕТ

Град Скопје оваа година започнува нов, транспарентен процес за креирање на буџетот за 2026 година, ставајќи ја вклученоста на јавноста во самиот центар на одлучувањето. Со јасна определба да се врати довербата на граѓаните во институциите, градските власти најавуваат дека финансискиот документ ќе биде изработен преку отворен и партнерски пристап, со цел секој жител, организација или заедница да може да даде конструктивен придонес.

Градот Скопје, кој се стреми кон стабилен развој, модернизација и поефикасни услуги, нагласува дека буџетот не е само финансиски документ, туку стратешка визија која ќе се гради врз реалните потреби и предизвици на граѓаните.

Градоначалникот Орце Ѓорѓиевски преку изјава ги повика сите заинтересирани да се вклучат во процесот:

„Почитувани скопјани, транспарентноста и отчетноста отсекогаш биле моја водилка. Токму затоа, годинава го отвораме процесот на планирање на буџетот за 2026 година заедно со вас, жителите на Скопје, невладиниот сектор, бизнис заедницата и сите кои сакаат да придонесат за подобро, поуредено и пофункционално Скопје. Вашите потреби, ставови и идеи ќе бидат основата врз која ќе го градиме овој важен документ.“

Ѓорѓиевски потврди дека веќе се собрани голем број конструктивни предлози преку постојана комуникација со граѓаните, но процесот е сѐ уште отворен. Тој ги повика сите партнерски да се вклучат во создавањето на буџетот кој ќе го забрза заживувањето на градот, нагласувајќи дека со заедничка визија и мудро планирање, Скопје може да се претвори во град со кој сите ќе се гордеат.

Градоначалникот најави дека новиот буџет ќе ги опфати приоритетните капитални проекти во делот на инфраструктурните зафати, културата, спортските содржини и животната средина, со цел да се олесни секојдневието на скопјани и да се донесе поголем квалитет на живот. „Ова е моментот кога секој може да влијае со конкретна идеја, предлог или забелешка. Верувам дека токму со ова отворено партнерство ќе создадеме стабилна основа за долгорочен развој и силно, достоинствено Скопје“, заклучи Ѓорѓиевски.