МТМ НЕТ

Градот Скопје интензивно продолжува со унапредување на спортската инфраструктура во скопските средни училишта, со цел создавање здрави, активни и мотивирани генерации. Овие инвестиции претставуваат важен чекор кон обезбедување современи услови за спорт и рекреација, кои ќе им овозможат на средношколците повеќе можности за развој и градење спортски навики.

Градоначалникот на Град Скопје, Орце Ѓорѓиевски, истакна дека ова е директна инвестиција во иднината на младите и темел на посилно и поенергично Скопје.

„Горд сум кога нашата визија што ја градиме, полека добива своја форма, што ми дава уште поголема инспирација и мотив да продолжиме уште посилно. Со силна и јасна цел да ги мотивираме средношколците да живеат здраво, ставаме огромен фокус во инвестирањето во спортската инфраструктура. Ова е инвестиција во здрави генерации кои се темелот на нашата иднина“, изјави Ѓорѓиевски.

Во моментов се во реализација нови и реконструирани спортски терени во повеќе средни скопски училишта:

СУГС „Браќа Миладиновци“: Добива повеќенаменско спортско игралиште.

СУГС „Здравко Цветковски“: Се гради повеќенаменско игралиште со специјално уредени спринт-патеки.

СУГС „Димитар Влахов“: Добива ново фудбалско и кошаркарско игралиште.

СУГС „Кочо Рацин“: Се реконструира фудбалското игралиште и теренот за одбојка, а целосно се обновува подот во спортската сала.

СУГС „8 Септември“: Добива игралиште за кошарка и одбојка.

СУГС „Ѓорѓи Димитров“: Се градат тениско, кошаркарско и фудбалско игралиште.

Градоначалникот нагласи дека сите терени се градат со висококвалитетни и издржливи материјали, односно полипропиленски спортски подови од ист тип како оние што се користеа на Летните Олимписки игри во 2024 година, со што се обезбедуваат безбедност, издржливост и професионални услови за тренинг.