МТМ НЕТ

Општина Илинден продолжува со инвестиции во модернизација на јавните комунални претпријатија со цел унапредување на услугите и поквалитетен живот за граѓаните. За потребите на ЈКП „Илинден“ е набавена нова противпожарна опрема, но и механизација за поефикасно одржување на јавната чистота, зеленилото и парковите.

Градоначалникот на Општина Илинден, Александар Георгиевски, при промоцијата на новата опрема истакна дека континуираното обновување на механизацијата е клучно за брзо, квалитетно и ефикасно извршување на комуналните услуги. Тој потенцираше дека набавката на противпожарна опрема е од особена важност, бидејќи значително го зголемува капацитетот за помош при интервенции во случај на пожар, со што се зголемува безбедноста на целата територија на општината.

Во рамки на набавката, обезбедени се 15 противпожарни метли и 10 грбни прскалки за гаснење пожари. Дополнително, набавена е нова опрема за одржување на јавната чистота и зеленилото, вклучувајќи моторни косилки (тримери), моторна пила, бензинска косилка и моторна прскалка (дувалка).

Со оваа модернизација, Јавното комунално претпријатие „Илинден“ ќе може уште поактивно да учествува и да помага при гаснењето на пожари, покрај своите редовни надлежности кои опфаќаат собирање и транспортирање на комунален отпад, одржување на јавната чистота, уредување на парковите и зелените површини, одржување на улиците, сообраќајниците и јавното осветлување.