МТМ НЕТ

Македонската артистка Александра Иванова го претстави својот најнов сингл „Дали сме“, емотивна поп-приказна реализирана во соработка со бендот D’reamers. Ова е специфичен поп-проект кој се одликува со отсуство на типичен рефрен и елементи на импровизација, ставајќи ја во прв план искреноста на вокалот и емоционалната длабочина на песната.

„Дали сме“ е современа поп-балада изградена врз нежната, но изразна вокална интерпретација на Александра. Песната зборува за ранливоста, предавањето и искрената поврзаност, обработувајќи моменти на копнеж, радост и неизвесност, но и желба емотивната врска да потрае.

Текстот и музиката се дело на Синиша Карафилоски и Александра Иванова, додека аранжманот го потпишува Дамир Пух. Продукцијата и финалниот микс се реализирани во „Green Room Sound Studio“.

Видеспотот ја надополнува приказната со минималистички сцени и симболики како поглед и отворање на книга којашто го претставува внатрешниот свет и мечти, лутањето низ градот како барање на себеси и емотивна поврзаност со другите, како и затворањето на книгата како симбол на затворање на едно поглавје и неизвесноста што останува да тлее. Спотот е снимен во Љубљана, град кој има значаен белег во градењето како на артистичкиот профил, така и на личниот развој на Александра Иванова.