МТМ НЕТ

Борбата против неформалната економија станува еден од клучните столбови на владината реформска агенда, со цел да се обезбеди економски раст, стабилност на јавните финансии и подобра заштита на работничките права, порача денеска министерот за економија и труд, Бесар Дурмиши. На обраќањето во Скопје, тој истакна дека државата воведува системски пристап за формализација на пазарот на труд, наместо досегашните парцијални решенија.

Според официјалните статистички податоци за 2024 година, од вкупно 694 илјади вработени во земјава, дури 85 илјади лица биле ангажирани неформално. За да се одговори на овој сериозен предизвик, од 1 јануари 2026 година започна примената на новиот Закон за работно ангажирање лица. Овој закон претставува суштинска реформа која овозможува легално, флексибилно и целосно електронско пријавување на повремените и сезонските работници, притоа гарантирајќи дека тие нема да ги изгубат веќе стекнатите социјални права.

Во првиот бран на примена, законот е насочен кон секторите каде сивата економија е најзастапена, како што се земјоделството, шумарството, угостителството и сервисните дејности во домаќинствата. Проценките на Министерството се дека преку овој нов модел ќе се формализира статусот на околу 17.400 лица. Реформата носи предвидливост за работодавачите преку поедноставена администрација, додека за работниците обезбедува загарантирана исплата по час и редовна уплата на придонеси.

Истовремено со оваа реформа, од почетокот на годинава стапи на сила и Законот за финансиска поддршка на инвестициите. Според министерот Дурмиши, комбинацијата од овие две законски решенија ќе создаде синергија помеѓу сузбивањето на нелегалните активности и поддршката за компаниите кои работат чесно, инвестираат и отвораат нови работни места. Со овие чекори, Владата се стреми кон создавање фер деловна клима и стабилна економска иднина за сите граѓани.