МТМ НЕТ

Во Општина Центар денеска се одржа средба со центарецот Дарко Митровиќ, кој на празникот Богојавление – Водици го извади светиот крст од водите на реката Вардар. Настанот помина во топла и свечена атмосфера, во духот на празникот и заедничките христијански вредности.

Митровиќ ја посети општината носејќи го со себе светиот крст, симболично пренесувајќи благослов, желби за здравје, среќа и благосостојба до вработените и до сите жители на Општина Центар. Посетата беше доживеана како чин на духовна сплотеност и надеж за успешна и мирна година.

Градоначалникот Горан Герасимовски му честиташе за подвигот и истакна дека ваквите традиции имаат особено значење за заедницата. Тој нагласи дека Општина Центар ќе продолжи да ги поддржува и негува обичаите што ги обединуваат граѓаните и внесуваат позитивна енергија во секојдневниот живот.

Дарко Митровиќ беше најсреќниот меѓу околу 160 учесници на централната манифестација кај мостот „Слобода“. Од Општина Центар му упатија честитки за овој значаен момент и му посакаа благословот да го следи него и неговото семејство во текот на целата година.