МТМ НЕТ

Општина Центар и годинава е покровител на традиционалната манифестација „Дебармаалски средби и серенади“, организирана од здружението „Гороцвет“ и Здружението на пензионерите. Настанот се одржува по повод празникот на виното и љубовта и го негува културното наследство и боемскиот дух на Дебар Маало.

Манифестацијата започна кај кафеаната „Кај Жабарот“, каде градоначалникот Горан Герасимовски, заедно со уметникот Живко Поповски-Цветин и присутните граѓани, симболично закрои лозово гранче, испраќајќи порака за љубов и мир. „Дебар Маало и денес е место каде се негуваат дружењата, уметноста и културата. Центар ќе продолжи да ја поддржува оваа прекрасна традиција и да ги пренесува овие вредности на идните генерации“, истакна Герасимовски.

Програмата продолжи со поетски рецитал, староградска музика и прошетка низ уличките и ресторани на Дебар Маало. Со поддршката на ваквите настани, Општина Центар ја потврдува својата посветеност на зачувување на традицијата, културното наследство и автентичниот боемски дух на оваа позната скопска населба.