МТМ НЕТ

Оваа недела, во просториите на „Катче за приказни“ во центарот на Скопје, на улица „Борка Талески“ бр. 21а, ќе се одржат детски креативни работилници посветени на традиционалниот обичај Мартинки.

Настанот ќе се реализира во два термина – од 11 часот за деца од 3 до 6 години и од 13 часот за деца постари од 6 години. Работилниците ќе траат по 90 минути, а бројот на учесници е ограничен, поради што е потребна претходна пријава.

Низ раскажување приказни и интерактивни активности, Василка Димитровска и Ена Чаусидис ќе ги запознаат најмладите со значењето и симболиката на мартинките, внесувајќи ги во духот на традицијата и пролетта.

Организаторите порачуваат дека секој јазол на мартинката носи порака за здравје и добросостојба, а работилницата претставува можност децата преку креативна работа да ја почувствуваат магијата на обичајот и празникот Баба Марта.

Настанот е во организација на „Катче за приказни“, во соработка со ХАЕМУС – носител на обичајот Мартинки впишан во УНЕСКО, како и со Kreaktiva – The Storytelling & Experience Design Studio.