МТМ НЕТ

„Веруваме дека повторната активација на истанбулскиот процес со нова, поширока содржина ќе биде корисна. Очекуваме сите партнери кои сакаат да го запрат крвопролевањето во регионот да покажат конструктивен пристап и да се вклучат во овој процес“, изјави Ердоган на заедничката прес-конференција со украинскиот претседател Володимир Зеленски во Анкара.

Ердоган нагласи дека продолжувањето на преговорите во Истанбул, со попрагматичен пристап, би можело да помогне во наоѓањето на патишта за мирно решение на конфликтот во Украина, кој продолжува да има разорни последици по целиот регион.

Турскиот претседател исто така потсети на хуманитарните успеси постигнати од трите рунди преговори кои беа организирани во Истанбул. Тој изјави дека Турција е подготвена да продолжи со разговорите со Русија и да изнесе предлози кои можат да го забрзаат прекинот на огнот и да отворат пат за праведен и траен мир.

„Истанбулскиот процес може да биде клучен за постигнување дипломатско решение во ова време на големи хуманитарни и безбедносни последици од војната. Турција останува посветена на својата улога како посредник и ќе продолжи да се заложува за мир“, изјави Ердоган.

Турција, која ја има улогата на медијатор во овој конфликт, истакна важноста на продолжување на дијалогот како начин за трајно решавање на кризата, во време кога напорите за мир на други фронтови не даваат резултати.