МТМ НЕТ

На петтата седница на Економско-социјалниот совет (ЕСС) беа дефинирани стратешките насоки за пазарот на труд и животниот стандард за претстојниот период. Министерот за економија и труд, Бесар Дурмиши, го претстави Оперативниот план за вработување за 2026 година, кој располага со буџет од 2,39 милијарди денари. Овие средства се наменети за активни програми за вработување, со посебен фокус на преквалификација на младите и вклучување на ранливите категории граѓани со цел нивно полесно прилагодување кон барањата на современиот пазар на труд.

Во однос на минималната плата, беше потврдено дека нејзиното усогласување во март ќе се врши според законски утврдената формула која обезбедува предвидливост за бизнис секторот. Формулата се заснова на балансиран сооднос од 50 проценти од растот на просечната нето плата и 50 проценти од порастот на трошоците за живот (инфлацијата). Дополнителен заштитен механизам во законот гарантира дека висината на минималната плата не смее да падне под прагот од 57 проценти од просечната нето плата во земјава.

Министерот Дурмиши истакна дека овој пристап е во согласност со европските практики и има за цел да го заштити стандардот на работниците, без притоа да се загрози опстанокот на малите и средните претпријатија. Според него, секое нагло зголемување на платите кое не е поврзано со економската продуктивност може да предизвика негативни ефекти врз стабилноста на економијата. Социјалниот дијалог меѓу Владата, синдикатите и работодавачите продолжува како единствен легитимен пат за креирање одржливи економски политики.