МТМ НЕТ

Премиерот Христијан Мицкоски денеска се обрати на презентацијата на новиот извештај на Светската банка – „Македонија: Излез од стапицата на среден доход“, каде што истакна дека во изминатите 27 месеци, односно во текот на 8 до 9 квартали од мандатот на актуелната Влада, просечниот економски раст на реална основа се движи над 3,5 проценти.

Тој подвлече дека ова е трипати повисоко во споредба со растот кај најголемиот трговски партнер на земјата – Европската Унија и еврозоната, каде што просекот изнесува меѓу 1 и 1,2 отсто, и покрај светските предизвици, енергетската криза и геополитичките тензии.

Говорејќи за надворешната трговија, премиерот нагласи дека во јули и август е забележан раст на извозот од 11,5 отсто, додека увозот пораснал за 8,5 проценти, посочувајќи дека државата успела да ја задржи најниската цена на дизел-горивото во Европа и да ја стави инфлацијата под контрола, движејќи се под европскиот просек.

Воедно, тој најави дека според анализите на Државниот пазарен инспекторат, инфлацијата кај храната и безалкохолните пијалаци за септември се очекува да се движи меѓу 1,5 и 2 отсто на годишно ниво.

Во делот на новите економски перспективи, Мицкоски ја истакна важноста од развојот на вештачката интелигенција и изградбата на податочни центри, за кои во моментов постои интерес од пет-шест сериозни инвеститори.

Тој нагласи дека Владата интензивно работи на прилагодување на законската регулатива со цел земјата да привлече инвестиции кои ќе овозможат извоз на услуги вредни стотици милиони евра.

Како значаен чекор во внатрешните реформи, премиерот ја издвои успешната ревизија во социјалната политика, при што откри дека по деталните проверки на терен биле откриени 4.500 лажни или неоправдани корисници на гарантирана минимална помош (ГМП).

Ова резултирало со месечни заштеди од 200 милиони денари, односно годишна заштеда од околу 25 милиони евра, средства кои, според него, директно ќе се пренасочат во капитални инвестиции.

На крајот, тој се осврна и на актуелните инфраструктурни и енергетски проекции, оценувајќи дека со нивното завршување значително ќе се зајакне геостратешката положба на земјата.

Фото: https://vlada.mk/