МТМ НЕТ

На маргините на Вториот министерски самит на четирите земји – Македонија, Бугарија, Грција и Србија, што се одржа во салата „Македонска соба“ во Палатата Србија во Белград, министерката за енергетика, рударство и минерални суровини Сања Божиновска оствари значајна билатерална средба со бугарската министерка за енергетика Ива Петрова.

На средбата присуствуваа и високи претставници од ресорното министерство, МЕПСО, НОМАГАС, како и челници на клучни енергетски субјекти од двете држави.

Во центарот на разговорите беа конкретните проекти и продлабочувањето на билатералната соработка во енергетскиот сектор.

Македонската делегација пројави особен интерес за бугарските искуства во делот на батериските системи за складирање електрична енергија, регулативата и финансирањето, за што бугарската страна понуди целосна експертска поддршка.

Исто така, беше разговарано за пазарната интеграција, прекуграничната размена, справувањето со енергетската сиромаштија и за Иницијативата Исток–Запад, која опфаќа изградба на нова преносна интерконекција меѓу Македонија и Бугарија, како и надградба на врските со Грција.

Двете министерки нагласија дека овие стратешки проекти ќе ја зајакнат енергетската стабилност, ќе ги зголемат преносните капацитети и ќе овозможат заеднички настап пред меѓународните финансиски институции.

Фото: https://energy.gov.mk/