МТМ НЕТ

Министерот за здравство, Сашо Клековски, оствари работна посета на Специјализираната болница за нефрологија во Струга, каде оствари средба со директорот д-р Јетмир Зиба и со медицинските работници.

За време на посетата беа разгледани условите за работа во оваа установа, која претставува значаен регионален центар за нефрологија и урологија, особено препознатлив по третманот и дијализата на пациенти со потешки здравствени состојби.

Во рамките на средбата беа презентирани импресивни статистички податоци за работењето на болницата во текот на претходната година, во која се изведени преку 16.600 хемодијализи, стотици крвни пристапи и илјадници прегледи и хоспитализации.

Исто така, беше истакнато дека болницата постепено се осовременува со нови машини за дијализа и набавена анестезиолошка опрема, со што се зголемува квалитетот на здравствените услуги.

Како еден од клучните предизвици со кои се соочува установата беше посочена неопходноста од генерациска смена на кадарот, со оглед на тоа што голем број искусни медицински сестри заминуваат или наскоро заминуваат во пензија.

Министерот и раководството нагласија дека навременото планирање и пренесувањето на драгоценото искуство на помладите колеги е императив за одржување на високите стандарди во работата на болницата.

Фото: Министерство за здравство