МТМ НЕТ

Заменик-претседателот на Владата и министер за транспорт, Александар Николоски, во интервју за „Радио Лидер“ изјави дека актуелната положба на државата е резултат на политиките на поранешната влада предводена од СДСМ, која, според него, прифатила се што побарала Бугарија и разговарала за продажба на пет приватни македонски компании.

Николоски нагласи дека тогашната власт му дала „празен лист“ на соговорникот да впишува барања, вклучувајќи идеи за преземање на национална телевизија, телеком-оператор, банка, рудник и кабелски оператор, користејќи ја сервилноста на тогашните структури.

Според Николоски, суштинската разлика меѓу претходната и актуелната власт лежи во заштитата на државните и националните интереси, додавајќи дека граѓаните тоа јасно го кажале на изборите во 2024 година кога ја десеткувале поддршката за СДСМ.

Тој истакна дека ВМРО-ДПМНЕ, заедно со коалициските партнери, добила силна народна доверба и дека сегашната владина поставеност цврсто ги брани македонските позиции, отфрлајќи какви било штетни и неформални пазарења од минатото.