МТМ НЕТ

Постојниот јавен простор кај „Три Бисери“ во општина Аеродром по неколку децении добива целосно нов, побезбеден и пофункционален изглед.

Градоначалникот Дејан Митески изврши увид во тековните градежни активности на оваа фреквентна локација, нагласувајќи дека целта на проектот е да се создаде уреден простор кој ќе ги задоволи потребите на сите генерации за безбедно движење, одмор и рекреација.

Во рамките на зафатите, старите, искршени и дотраени плочки на големиот плочник и пешачките патеки се заменуваат со нови, со што се зголемува безбедноста на пешаците.

Дополнително, просторов се збогатува со ново, современо детско игралиште наменето за најмладите жители, а по повеќе децении се врши и целосно уредување на бетонските клупи со поставување квалитетни дрвени даски за седење.

За зголемување на функционалноста на локалитетот, предвидено е и поставување нови метални држачи за велосипеди.

Градоначалникот Митески истакна дека овие активности се дел од пошироката стратегија на Општина Аеродром за интензивно инвестирање во нова урбана опрема, реновирање на постојните и поставување нови детски и спортски игралишта низ целата општина, при што упати апел до граѓаните заеднички да се чува новосоздадената инфраструктура со цел нејзино подолго траење.