МТМ НЕТ

Вечерва во 19:00 часот, во просториите на Македонскиот културно-информативен центар во Белград, ќе се одржи промоција на поетскиот првенец „Ткажалки“ од авторката Александра Јуруковска, која е добитничка на престижната награда „Даница Ручигај“ на Друштвото на писателите на Македонија за 2025 година.

Настанот ќе се реализира во форма на разговор со авторката, а програмата ќе ја води новинарката Сребра Ѓорѓијевска.

Книгата „Ткажалки“ содржи триесетина песни кои според книжевната критика претставуваат фино ткаен мост помеѓу интимното и универзалното, носејќи нота на суптилна општествена ангажираност, женски отпор и борба против колективниот заборав.

Самата авторка, Александра Јуруковска, е истакната книжевна критичарка, новинарка и културна промоторка со повеќе од две децении активен придонес на македонската културна сцена.

Автентичната културна соработка продолжува и следниот ден, на 6 октомври, кога Јуруковска и Ѓорѓијевска ќе бидат дел од специјална панел-дискусија посветена на видливоста на културата во македонскиот и српскиот општествен контекст, под водство на директорот на КИЦ во Белград, Васко Шутаров.

Фото: Министерство за култура и туризам