МТМ НЕТ

Автобуската линија со број 35 ќе биде продолжена до Радишани, со што жителите на Општина Бутел ќе добијат директна автобуска врска со Аеродром и Ново Лисиче.

Информацијата ја објави градоначалникот на Општина Бутел, Дарко Костовски, кој соопшти дека процедурата за продолжување на линијата е завршена. Според неговата објава, договор за продолжувањето е постигнат со градоначалникот на Град Скопје, Орце Ѓорѓиевски, и директорот на ЈСП.

Костовски најави дека во наредните денови ќе биде презентиран новиот возен ред, а потоа ќе започне и пробно сообраќање на продолжената линија. Автобусот ќе продолжува до последната постојка на линијата 57 во Радишани.

Линијата 35 во моментов сообраќа на релација Железничка станица – Ново Лисиче – Железничка станица Скопје Север. Предлогот за нејзино продолжување до Радишани беше објавен минатиот месец, по барања и предлози од жители на Бутел.

Од Општина Бутел очекуваат продолжената линија да биде добро прифатена од граѓаните и да прерасне во трајно решение.

Со продолжувањето на 35-ката, за жителите на Радишани и Бутел се отвора уште една директна врска кон источниот дел на Скопје, без потреба од преседнување.