МТМ НЕТ

На спортските терени при ООУ „Јан Амос Коменски“, во присуство на градоначалникот Сотир Лукровски и претседателот на Советот, Христо Саракинов, свечено беа отворени овогодинешните училишни спортски лиги, со што започнува нов циклус на активни спортски натпревари за учениците од основните училишта на територијата на општина Карпош.

Во рамките на овогодинешните лиги, учество ќе земат ученици од сите десет основни училишта во општината, кои во текот на целата година ќе имаат можност да се натпреваруваат и да ги усовршуваат своите спортски вештини.

Натпреварите ќе се одвиваат во три дисциплини – фудбал и кошарка за момчиња, како и одбојка за девојчиња.

За реализација на спортската програма, кошаркарските и одбојкарските средби ќе се играат во реконструираната спортска сала „Партизан“, додека фудбалските натпревари ќе се одржуваат на специјализираните спортски терени во населбата Влае.

Обраќајќи им се на младите спортисти, градоначалникот Лукровски ја истакна заложбата на локалната самоуправа за креирање квалитетни услови за развој на детскиот потенцијал, порачувајќи им дека инвестирањето во спортот значи градење здрави дисциплинирани навики со надеж дека меѓу нив се кријат и идни репрезентативци на Македонија.

Фото извор: https://www.facebook.com/OpstinaKarpos