МТМ НЕТ

Општина Кисела Вода официјално стана дел од значајниот 42-месечен европски проект „UrbanFood“ (Одржливи лаборатории за урбани прехранбени системи), со што претставува единствената општина од Македонија која учествува во оваа престижна меѓународна иницијатива финансирана од Европската Унија преку програмата „Horizon Europe“.

Почетокот на имплементацијата беше означен на иницијалниот настан во Атина, чиј домаќин беше Земјоделскиот факултет под раководство на проектниот координатор CERTH, каде делегацијата од Кисела Вода, заедно со македонскиот партнер „АгФутура Технологии“, презентираше ги капацитетите и можностите на општината кои ќе бидат ставени во функција на проектот.

Проектот има за цел да ги позиционира урбаните средини како двигатели на поздрави и климатски отпорни прехранбени системи, преку воспоставување на шест специјализирани лаборатории низ Европа, од кои едната ќе функционира токму во Кисела Вода.

Во соработка со граѓаните, истражувачите, малите и средни претпријатија и заедницата, таму ќе се ко-креираат и тестираат иновативни решенија кои ги поврзуваат одржливото производство на храна, дигиталните технологии и партиципативното управување.

Конзорциумот го сочинуваат 18 партнери од неколку европски земји, а очекувањата се преку имплементација на најдобрите европски практики да се обезбеди директен бенефит за граѓаните, поздрава животна средина и развој на локалната економија.

Ова го пренесува градоначалничката на Општина Кисела Вода, Бети Стаменкоска Трајкоска.

Фото извор: https://www.facebook.com/betistamenkoska