МТМ НЕТ

Денеска, со почеток во 18:00 часот, во Културниот центар Белград, Македонскиот КИЦ, со поддршка од Министерството за култура и туризам, организира исклучителен рецитал за флејта на кој ќе настапи истакнатата флејтистка Фјола Рамадани, во пијано-придружба на уметницата Јасна Аврамовска.

Настанот официјално ќе го отворат директорот на КИЦ во Белград, Васко Шутаров, и уредничката на музичката програма на Културниот центар Белград, Дамјана Његиќ.

Пред белградската публика ќе биде презентирана богата музичка програма која опфаќа врвни дела од Пјер Санкан, Шарл-Мари Видор и Франц Шуберт, како и домашното уметничко остварување „Инвенција Сиринкс“ од значајниот македонски композитор Томислав Зографски.

Концертот ги обединува двете реномирани уметници со богати професионални биографии.

Флејтистката Фјола Рамадани дипломирала на Универзитетот за музика и уметност во Анкара во класата на професорите Х. Х. Тургај и О. Учар, дополнително надградувајќи се на мајсторски курсеви во Париз и Истанбул, а зад себе има и низа признанија и награди од меѓународни натпревари.

Пијанистката Јасна Аврамовска дипломирала на Факултетот за музичка уметност во Скопје под менторство на проф. Снежана Анастасова-Чадиковска и проф. Тодор Светиев, а магистрирала на Музичката академија „Панчо Владигеров“ во Бугарија кај проф. Жени Захариева, остварувајќи бројни солистички настапи со домашни и странски оркестри низ неколку европски земји, Турција и Соединетите Американски Држави.

Фото извор: https://kultura.gov.mk/