МТМ НЕТ

Со свечената проекција на филмот „Мајка“ во режија на Теона Стругар Митевска, вечерва (21 септември) во Тирана започнува Интернационалниот филмски фестивал, каде што македонската кинематографија годинава добива исклучително значајно место преку специјална програма со пет филмски остварувања.

Специјалната програма насловена „Фокус на современиот македонски филм“ е иницирана и реализирана од Македонскиот културен центар во Тирана, под раководство и координација на директорката Ема Попивода, во соработка со реномираниот фестивал.

Директорката Попивода ја истакна важноста на овој настап, нагласувајќи дека присуството на пет македонски филмови, два стручни мастер-класа и македонски претставник во жирито претставува силна промоција на националното творештво и отвора нови патишта за меѓународна културна соработка.

Покрај отворањето со „Мајка“, фестивалската публика ќе има можност да ги проследи и филмовите на истакнатите автори Милчо Манчевски, Митко К. Панов, Ханис Багашов, како и заедничкото остварување на Ибер Деари и Мирсад Абази.

Програмата е збогатена со два мастер-класа што ќе ги одржат Теона и Лабина Митевски, нудејќи директен увид во фазите на создавање, развој и продукција на едно филмско дело, додека македонскиот продуцент Јане Ќортошев ќе ја врши функцијата член на жирито на фестивалот.

Реализацијата на оваа значајна македонска филмска презентација и придружните настани е овозможена со поддршка од Македонскиот културен центар во Тирана и Министерството за култура и туризам на  Македонија.

Фото извор: https://kultura.gov.mk/