МТМ НЕТ

Утре, со почеток во 20 часот, во Културно-информативниот центар на Македонија во Истанбул ќе биде свечено отворена групната изложба насловена „Од Македонија до Истанбул“, во организација на Здружението за ликовна уметност „Драудакум“ од Гостивар.

Пред истанбулската културна публика ќе бидат претставени значајни дела од современото македонско ликовно творештво, застапени во повеќе различни медиуми и изразувачки техники, меѓу кои сликарство, скулптура, графика, уметничка фотографија и видеоуметност.

Здружението „Драудакум“, основано во 1999 година, веќе повеќе од две децении континуирано придонесува за успешна афирмација на домашните ликовни автори и нивно поврзување со современите уметнички текови.

Овој значаен уметнички проект е реализиран со поддршка од Министерството за култура и туризам, со јасна цел да се поттикне меѓународната промоција на македонското современо творештво и да се унапреди плодниот културен дијалог и соработката меѓу Македонија и Турција.

Фото извор: https://kultura.gov.mk/