МТМ НЕТ

Македонскиот културен центар во Истанбул утре вечер, со почеток во 19 часот, ќе биде домаќин на значајна музичка манифестација – концертната вечер насловена „Патување низ звуците“, на која пред истанбулската публика ќе се претстават истакнати домашни уметници.

На сцената ќе настапат сопранот Дајана Малолари Пајазити, виолинистот Шкелзен Пајазити и пијанистката Едита Руси, изведувачи кои зад себе имаат богато концертно искуство и бројни признанија освоени на домашни и меѓународни фестивали и натпревари.

Музичката програма опфаќа внимателно одбрани дела од значајни домашни и светски композитори, меѓу кои Тодор Скаловски, Антонин Дворжак, Винченцо ди Кјара, Франц Лехар, Јохан Себастијан Бах, Родолфо Фалво и Дмитриј Шостакович.

Концертот е замислен како инспиративно уметничко патување низ различни музички епохи и стилови, со што се отвора уште една можност за успешно претставување и промоција на македонската музичка уметност пред меѓународната јавност.

Фото извор: https://mdt.gov.mk/