МТМ НЕТ

Министерот за култура и туризам, Седат Сулејмани, во рамките на својата официјална работна посета на Република Турција оствари низа значајни средби со високи турски државни функционери и посетуваше културни институции, со цел унапредување на билатералните односи и соработката во областите на културата, туризмот и заштитата на наследството.

Централната активност опфати билатерална средба со неговиот домаќин и колега, министерот за култура и туризам на Турција, Мехмет Нури Ерсој, на која во фокусот беа прашањата за туристичката промоција, соработката во рамките на УНЕСКО, функционирањето на Културно-информативните центри во Скопје и Истанбул, како и заштитата на културното наследство.

По завршувањето на разговорите, двајцата министри присуствуваа на отворањето на изложбата „Колекција на метални пари ковани во Скопје и Кратово (XIV–XVII век) – Патувањето на парите“, авторски подготвена од м-р Даниела Николова и поставена во престижниот Музеј на анадолските цивилизации во Анкара.

Во рамките на програмата, министерот Сулејмани ја посети и Националната библиотека во близина на Претседателскиот комплекс, каде што се запозна со организациската поставеност и современите услови што им се нудат на истражувачите и читателите.

Исто така, Сулејмани оствари и посебни средби со заменик-министерот за правда Седат Ајјилдиз и со заменик-министер за внатрешни работи Булент Туран, на кои беа разменети мислења за зајакнување на меѓуинституционалните врски и соработката од заемен интерес меѓу двете земји.

Фото извор: https://kultura.gov.mk/