МТМ НЕТ

Директорот на Бирото за јавна безбедност (БЈБ), Александар Јанев, го посети Одделението за внатрешни работи во Прилеп, каде оствари работна средба со раководството и истражните тимови по неодамнешната голема полициска операција за сузбивање на организирана криминална група.

Во рамките на долготрајната истрага спроведена во Прилеп, Скопје и Струга, полицијата изврши претреси на 37 локации – меѓу кои и кај четворица полициски службеници од ОВР Прилеп – при што во банкарски сеф беа пронајдени над 50.000 евра, а запленети се и моторни возила.

Јанев истакна дека операцијата била резултат на повеќемесечна посветена, истрајна и чесна работа на полициските службеници, кои соработувале со надлежните институции.

До Јавното обвинителство за гонење на организиран криминал и корупција е поднесена кривична пријава против 21 лице, а судот во Скопје веќе определи мерки за нивно обезбедување.

Директорот нагласи дека со ова успешно акциско заокружување „падна митот за недопирливите во Прилеп“, испраќајќи порака дека никој не може да се крие зад познанства и врски.

Посетата на Прилеп не означува крај на активностите, туку почеток на уште поинтензивно и повидливо присуство на полицијата на терен, со цел трајно зачувување на јавниот ред и сигурност.

Јанев упати апел до граѓаните активно да соработуваат со институциите и да пријавуваат криминални појави, потсетувајќи дека меѓусебната доверба се гради преку конкретни и видливи резултати.

Фото: МВР