МТМ НЕТ

Од опозициската СДСМ излегоа со остри реакции на актуелните политички случувања, обвинувајќи ја власта предводена од ВМРО-ДПМНЕ за манипулации, бегство од соочување со фактите и свесно кочење на евроинтеграциите.

Нагласувајќи ја неодамнешната посета на претседателката на Европската комисија, Урсула фон дер Лајен, од партијата потсетија дека од Брисел официјално беше потврдено дека македонскиот јазик и идентитет се целосно заштитени и дека земјата ја чека отворањето на првиот кластер „Основи“.

Според СДСМ, поранешните лажни наративи за наводна загроза на националните интереси и укинување на меѓународните договори сега се целосно демантирани од самата реалност и од изјавите на највисоките државни и европски функционери, кои по доаѓањето на власт ги прифатија постоечките решенија како ремек-дело на дипломатијата.

Партијата истакнува дека вистинската причина зошто премиерот Христијан Мицкоски го одбива европскиот пат не е заштитата на идентитетот, туку стравот од реформи во судството, борбата против корупцијата и доаѓањето на европскиот обвинител Лаура Ковеши.

Во реакцијата се отвараат и прашања за бројни домашни и надворешни афери, трансакции со странски кредити и енергетски зделки, при што СДСМ ги отфрла партиските напади врз опозицискиот лидер Венко Филипче како класично бегство од аргументи.

На крајот, од опозицијата порачуваат дека граѓаните се свесни оти блокадата на европскиот пат служи исклучиво за заштита на лични и теснопартиски интереси на актуелната власт.