МТМ НЕТ

Во текот на изминатите 24 часа, полициските службеници на територијата на државата лишија од слобода 12 возачи поради сторено кривично дело „безобѕирно управување возило“ по член 297-а од Кривичниот законик.

Акцијата е дел од редовните и засилени контроли на МВР за зголемување на сообраќајната безбедност и санкционирање на несовесните учесници во сообраќајот.

Според полициските податоци, деветмина од уапсените лица управувале моторни возила без воопшто да имаат положено возачки испит, меѓу кои и двајца малолетници (на возраст од 15 и 16 години).

Прекршителите се регистрирани на подрачјата на Скопје, Студеничани, Битола, Градско, Велес и Делчево.

Дополнително, во текот на акциите се приведени и две лица кои управувале возила под дејство на алкохол и со активна законска забрана, како и едно лице кое управувало возило под дејство на алкохол.

Од МВР информираат дека по целосно документирање на сите случаи, против прекршителите ќе бидат поднесени соодветни кривични пријави.

Од надлежните институции упатија силен апел до сите граѓани строго да ги почитуваат сообраќајните правила и прописи.

Нагласено е дека управувањето возило без возачка дозвола, под дејство на алкохол или со изречена забрана претставува сериозна закана за животот, а полицијата најавува продолжување на неселективните контроли на патиштата.