МТМ НЕТ

Во Домот на културата во Ченто, во Општина Гази Баба, официјално беше отворена новата канцеларија „Една точка за услуги“, чија цел е да ги донесе институциите поблиску до граѓаните и да ги поедностави административните процедури.

На свеченото отворање присуствуваа градоначалникот на Општина Гази Баба, Бобан Стефковски, министерот за дигитална трансформација, Стефан Андоновски, како и пратениците Зоран Коцевски и Дијана Илиевска.

Градоначалникот Стефковски беше првиот граѓанин кој ја искористи оваа можност и преку новата канцеларија успешно извади документ за евиденција на годините работен стаж.

Преку „Една точка за услуги“, жителите на општината ќе можат да добијат стручни информации, насоки и конкретна поддршка при користењето на вкупно 338 електронски услуги кои се достапни преку националниот портал uslugi.gov.mk.

Проектот е насочен кон заштеда на време за граѓаните, елиминирање на непотребното одење од една до друга институција и правење на административните услуги полесни и подостапни.

Од локалната самоуправа истакнуваат дека дигитализацијата има вистинска вредност тогаш кога директно му го олеснува секојдневието на човекот, намалувајќи ги административните обврски и зголемувајќи ја ефикасноста на јавните услуги.