МТМ НЕТ

Македонските академски граѓани од денеска добиваат сместување кое целосно ги исполнува современите европски стандарди, по официјалното пуштање во употреба на целосно обновениот студентски дом „Стив Наумов“ во скопската општина Гази Баба.

Проектот, кој обезбедува врвни услови за живеење и учење на 1.150 студенти, беше реализиран преку успешна соработка со Германската развојна банка и Европската Унија, како и со посветена координација на домашните институции.

Градоначалникот Бобан Стефковски истакна дека оваа инвестиција претставува јасен доказ оти младите генерации се врвен приоритет и дека заложбите за нивната иднина се остваруваат преку конкретни и видливи дела.

Според него, квалитетното образование мора да биде следено со соодветна инфрастуктура во која студентите можат непречено да се посветат на своите обврски и остварување на своите амбиции.

Со најавите за натамошно зголемување на капацитетите, овој проект означува важен чекор во подобрувањето на студентскиот стандард во земјата.

Стефковски упати честитки до сите чинители кои придонесоа за успешно завршување на зафатот и им посака успешни студии на младите, нагласувајќи дека нивниот труд и знаење се главниот столб за иднината на целото општество.

Фото: https://www.facebook.com/StefkovskiB