МТМ НЕТ

Во Скопје е во тек полициска акција на повеќе локации, во која учествуваат Министерството за внатрешни работи и Агенцијата за национална безбедност.

Од Основното јавно обвинителство за гонење на организиран криминал и корупција информираат дека акцијата се спроведува под раководство на јавен обвинител, а повеќе лица се приведени поради сомнение за сторени кривични дела од областа на тероризмот.

Засега од Обвинителството не откриваат детали за осомничените лица, конкретните кривични дела или наодите од акцијата.

Дел од медиумите објавија неофицијални информации дека при претресите наводно биле пронајдени оружје, муниција и знаме на Исламската држава, како и дека се работи за група од неколку лица. Овие информации засега не се потврдени од надлежните институции, па не може да се третираат како официјални факти.

Од ОЈО ГОКК најавија дека јавноста ќе биде информирана по завршувањето на акцијата.