МТМ НЕТ

Министерот за земјоделство, шумарство и водостопанство, Борче Серафимовски, денеска во Куманово ги отвори деветтиот Меѓународен саем на органски и традиционални производи „Органска трпеза 2026“ и петтиот Меѓународен саем за земјоделство, технологии, храна и преработки „АгроМак 2026“.

На манифестацијата, која обедини бројни домашни и странски производители и изложувачи во организација на здружението „Живот“, Комората на органски производители на Македонија и Општина Куманово, беше истакната важноста од развојот на органското земјоделство како економска гранка со висока додадена вредност.

Во своето обраќање, министерот Серафимовски нагласи дека органското производство претставува современ, прецизен и строго контролиран систем кој бара посветеност, знаење и вистинска грижа за животната средина и здравјето на граѓаните.

Тој порача дека трудот на производителите мора да биде соодветно валоризиран и заштитен од нелојална конкуренција и лажно декларирани производи, поради што министерските политики остануваат насочени кон заострување на контролите, сигурна сертификација и гаранција за квалитетот.

Серафимовски се осврна и на важноста од примена на современи технологии, нова механизација, дигитални решенија и системи за прецизно наводнување, кои им овозможуваат на земјоделците рационално управување со ресурсите и подобрен пласман на пазарот.

Манифестацијата продолжува да служи како значајна регионална платформа за промоција на домашните потенцијали и соработка во агросекторот.

Фото: https://www.mzsv.gov.mk/