МТМ НЕТ

Пратеничката и потпретседателка на СДСМ, Јована Тренчевска, на денешната прес-конференција изнесе сериозни обвинувања на сметка на Владата, истакнувајќи дека премиерот Христијан Мицкоски и актуелната власт го донеле Фондот за пензиско и инвалидско осигурување (ПИОМ) пред целосен колапс.

Според неа, дефицитот во Пензискиот фонд достигнал историски размери од 1 милијарда евра, што претставува над 14% од целиот државен буџет, а анализите на Фискалниот совет предупредуваат дека оваа „дупка“ во наредните години може да се зголеми на 1,3 милијарди евра.

Тренчевска нагласи дека и покрај зголемувањето на придонесот за ПИОМ преку пренасочување на средствата од Агенцијата за вработување, финансиската состојба се влошува, а исплатата на пензиите е доведена во ризик.

Таа обвини дека власта планира нови наноси врз економијата преку зголемување на придонесите за пензиско осигурување, што дополнително ќе ги зголеми трошоците за работодавачите и ќе резултира со помали нето-плати за работниците.

Исто така, од опозициската партија предупредија дека власта наводно под изговор за „измислени инвестиции“ се подготвува да посегне и по заштедите на граѓаните од вториот пензиски столб, оценувајќи го тоа како класичен арамилук со животната сигурност на сегашните и идните пензионери.

Фото и видео: СДСМ