МТМ НЕТ

Од владејачката партија ВМРО-ДПМНЕ излегоа со остра реакција на најновите прес-конференции и обвинувања од редовите на опозициската СДСМ, оценувајќи дека изјавите на Андреј Жерновски и Јована Тренчевска претставуваат само повторување на „предавнички политики“ и ширење вештачка паника кај граѓаните.

Од партијата истакнуваат дека хистеријата во опозицијата се кренала токму во момент кога на средбите со претседателката на Европската комисија се иницирало подобрување на македонските преговарачки позиции и отворање пат кон ЕУ, обвинувајќи го СДСМ дека им пречи секој успех на државата.

Во соопштението се отфрлаат како неосновани тврдењата дека Пензискиот фонд е пред колапс и дека пензиите се во ризик, нагласувајќи дека фондот е стабилен, пензиите се исплаќаат навремено, а пензионерите во изминатите две години добиле значајно линеарно зголемување за разлика од „мизерните зголемувања од 90 денари“ во времето на поранешната власт.

ВМРО-ДПМНЕ порачува дека апокалиптичните сценарија на опозицијата за економијата и пензиите ќе се стопат како меур од сапуница, додавајќи дека единствената вистинска криза и загрозеност на политичката сцена во моментов владее токму во редовите на СДСМ поради внатрепартиски проблеми и недоверба од граѓаните.